رأي حربوشي: كون جات “أليس” لبلاد المغرب

 


بلادي هي بلاد الغرائب و العجائب و الكاتب لي كتب ” أليس في بلاد العجائب ” كنتمنى ندير معاه شي نقاش مطول باش نقنعو يحول كتابو من أليس في بلاد العجائب لأليس في المغرب .
طاحت عليا هد الفكرة ( و الحمد لله خويت عليها ) حيت تطرح ڭدامي سؤال : شنو لي خلا هد أليس تبان ليها ديك البلاد ، بلاد عجيبة ؟.
شافت جنود عبارة على كارطات كيهدرو ، تا حنا ڭاع المسؤولين فهد البلاد عدنا كارطات فينما كتحرڭ شي وحدة يصب عليها أشد عذاب . شافت دودات القز كيضربو الشيشة ، و غير بيناتنا هادي تجيها عجب ؟ كون جات و طلت على قهاوي الشيشا عدنا ، تلقى دريات ما وصلينش تا 15 عام هيا رق من الشيشة و باركا تخبط ( واخا حنا ڭعما شغلنا فيهم ) . و لا واقيلا جاتها عجب فديك البلاد هيا هديك الكيكة لي كتكبر و تصغر بنادمم ( و كان ؟؟) هديك الكيكة موجودا عدنا فالبلاد و حنا كتعبد عدنا ڭاع و هد الشي لي مكانش عندهم فديك البلاد ، هد الكيكة هيا الفلوس ( النقود ، عمر ، الضورو ، إله البشرية …) ، لا كانت عندك بزايد نتا هوا الإمبراطور الأعظم و مول الكلمة و الشوار فالزنقة مع صحابك فخدمتك و حتى فدارك و مع واليديك ، ولا معندكش نتا هو أصغر و أحقر بنادم في المجتمع و هد الشي مجبناهش من والو بل تجربة شخصية يا أليس .
نحلف لك باش ما بغيتي يا أليس كون ضربتي شي طلة فالمغرب غتقتنعي و غتحاولي تقنعي لويس كارول باش يبدل سميت الكتاب . على ما ڭال لينا بلي جاك عجب منظر حيوانات كيشربو أتاي في الوقت المحدد ببريستيج إنجليزي ، تا حنا عندنا منهم بزاف وجههم مقزدر لا يمرڭون هد الحيوانات تا هيا ناطقة و كتدعي الثقافة هد الحيوانات هوما المثقفين المغاربة ، صحاب ثقافة صالونات الشاي و الخمر ، هوما أكبر مفترين على الثقافة و الأدب و هوما أكبر آلة تضليل تستعمل من أجل تكليخ الأجيال الصاعدة ، واش بان ليك شي عجب كتر من هد الشي ؟
دابا أنا غنڭولك شي عجب لي عمرك ماغتشوفيه إلا فهد البلاد السعيدة ، هد الشي علاش ديك البلاد لي شفتي ما جاتنيش بلاد عجائب و ها أسبابي :
فبلادنا يقد يعترف بنادم بحويج دارها و حويج ما دارهاش تحت التعذيب ، و هد الشي لي ماكانش عندكم فديك البلاد .
فبلادنا شافو إنسان ( لي هوا محمد الخامس) فوق سطح القمر و هد الشي لي معندكمش فديك البلاد ، و الكوميك فهد الشي كامل لا مشيتي حتى كذبتي هد الأسطورة غيتهموك بالجهل و العمالة للجزائر و للإسبانيا و لجبهة البوليزاريو.
فبلادنا كذبت أبريل كيتيقوها الناس واخا عارفينها غير كذبة ، بحال الأقزام لي بانو فكازا ( الناس بيتين فالزنقة باش يشوفوهم )، و عمر لي كيطلع من الحيوط و كيدخل من الشرجم و يشفر الدراري و السفاح لي شافوه فسلسلة كوميدية و الغد بداو كيڭولو بلي شافوه بصح و بلي كيخطف العيالات ( أنا كنت كنتمنى تبان غير كات وومن و تخطفني ، و الله تا نمشي معاها بدون مقاومة ) ، و لكن هد الشي كامل راجع للكذوب لي كنعيشو فيه على طول العام ولي واخا عارفينو كذوب و مع ذلك تاهوا كنتيقوه ، بحال الشرطة فخدمت الشعب و الحكومة و البرلمان يمثلان الشعب ( اللهم طولك يا روح) و مغرب الديمقراطية و سلسلة الإصلاحات الخيار الديمقراطي و الخيزو الزمزمي و هد الشي كامل كنتحداك ذكري ليا شي حاجة كطرا منو فديك البلاد .
أتحداك يا أليس و أنا مآمن بلي غنربحك لسمعتي فديك البلاد بشي واحد سميتو “بوخنشة” بحال هد الشخصيات مغتلڭايهم غير فالمغرب كنتحداك لا عرفتي بّابّا عجيبة ، و بحال هد الشخصيات موجودين فالمغرب كامل غير كين بيناتهم إختلاف فالإسم و المهنة من منطقة لخرى.
الطفولة فبلادي هي الأكثر غرابة و العجيبة كتر من قصص ألف ليلى و ليلة و لي مكيناش فديك البلاد لي شفتي و جاتك غريبة ، فبلادي فاش كنا صغار زرعنا الفلوس ، فأمل يكبرو على شكل شجرة ديال الفلوس لي غنجنيوها و نشريو بيها ألعاب و حويج و كين لي من قوة أحلامو نوى يشري دار و طونوبيل لولديه و يسافر للغربة و يتجوج شهبة ( هد الشي بصح طاري ) .فديك البلاد ماكانوش كيداويو عينيهم لا مرضو ليهم بشعيرة و 7 حجرات ، فديك البلاد معندكمش عام البي و عام الدور و عام الطرومبية و بزاف العوام لي كتكون فعام واحد ولي تقدر تعاود 3 مرات فعام واحد . فديك البلاد معندكمش لو بخاصون و بوزبال و الموسطاشات و عنيبات . فديك البلاد معندكمش مسؤولين لي حتى البنية التحتية ما مڭادا و دارو طرام واي و باغين يديرو طي جي ڤي و كيشريو فالسلاح . فديك البلاد معندكمش شعب كيدير مضاهرة حيت وحد الرمز مقدس تسب ليه ، و هو النهار و ماطال و هو يسب فلي خلق داك الرمز المقدس . فديك البلاد معندكمش شعب كيضامن مع ڭاع الشعوب المضطهدة لدرجة نسى راسو فالإضطهاد . فديك البلاد معندكمش بنادم كيتشد فالحبس و التعذيب و التصفية الجسدية على قبل شعب باش يعيش ، و فاللخر كيڭولو ليه سرك نتا لي كتقلب عليها أش داك نتا تهضر أصلا . فديك البلاد نقاذ كيتباعو و يتشراو بربعة البيرات فأرخص البيران . فديك البلاد معندكمش طبيب كينسى مقص و سط كرشك فاش تسالي العملية ، ولي غالبا ديرها غير باش يتخلص من عندك ماشي حيت نتا محتاجها . فديك البلاد معندكمش لي كيبزنزو فالدين و يعمرو حساباتهم البنكية و يڭولك الربا حرام ( ولا ڭد حيت مالين البنكات أغلبهم صحاب سلطة )، و يڭولو بلي الإنتفاضة ضد الظلم و الحڭرة و الخروج على السلطان حرام . كنتحداك و بالدارجة نتخاطرو أنا و ياك بمية درهم ( واخا منكسبهاش فهد اللحظة ) و لكن عارف راسي غنربح ، حيت قانون بلادي ماشي بحال قانون ديك البلاد ، بند يعطيك الحق و بند خور ضد داك الحق و على حساب نتى شكون ولا فجيبك شحال كيشوفو إنى بند يستعملو معاك و هد الشي لي عطى فرصة للناس لي حاكمين ولي كيكتبو هد القوانين على ڭانتهم و لي كيعرفو كيفاش يلعبو بيه و لي هوا أصلا أصلا غير فوڭ الفقراء فقط ، و قبل ما توافقي تخاطري معايا نصحك نصيحة لوجه الله بلا ماتحاولي حيت غندي ليك ديك مية درهم ولي مستحيل تلقاي بنك لي غيحول ليك عملة ديك البلاد لي هيا كيكة و معاملة زوينة لمية درهم ، حيت فبلادي المعاملة الزوينة و الضحكة ما بقاتش خداما ، دابا كين غير كيف كيڭول الشاعر “بوشعيب الزياني”( ولي مكينش بحالو عندكم فديك البلاد) : عندك مليون تسوى مليون يا ولد الناس معندك والو الهدرة لاش ؟
فبلادي عندك الفلوس زيدة ركلا راك مواطن درجة أولى. عندك السلطة على بنادم مكتصنفش بالعكس نتا لي كتصنف و كتبقى فوق التصنيف على حساب السلطة لي عندك . فديك البلاد معندكمش طوبيسات كيهزو كتر من داك الشي لي مسموح ليهم بيه بالضوبل و التريبل . فديك البلاد معندكمش شركة كتخد الما من منابع لي هي من حق الشعب و تعود تبيعهم لنفس هد الشعب فقراعي ديال البلاستيك ( كتبيع ليه ديالو) . فديك البلاد معندكمش ناس كيبيعو كبدة ولا كلوة باش يضمنو لقمة عيش . فديك البلاد معندكمش بزاف ديال الغرائب ولاعجائب لي كطرى فهد البلاد و عنستدل بالمقولة الشهيرة للفيلسوف الشعب المغربي ولي هيا : ما دمت في المغرب فلا تستغرب .

 

  • حربوشي خو نينجا

 



شاهد أيضا
تعليقات الزوار
Loading...